هل فعلا تغيرتي بعد الزواج؟؟

لم يمضي علي زواجه بضعة اشهر .. 

كان مهموما لايبتسم مثلما كان سابقا 

سأله صديقه فأجاب لقد تبدلت زوجتي من بعد الزواج فقال له ومن الذي بدلها وكيف سكتت علي تبديلها واتبدلت فين في الميكروباس ولا كنت حاططها في شنطة

فقال له انا لاأمزح فليست هي تلك الفتاه الرقيقة التي كانت أيام الخطوبة  لقد تبدل صوتها الرقيق واصبح كصفارة الإنذار يدوي فجأه  بدون سابق إنذار(بتفجع لما تتكلم)

دايما شايفاني غلط أنا وأهلي واللي خلفوني كلهم 

لو نمت أبقي غلطان وبرده لو قمت أبقي غلطان لو غيرت هدومي يبقي أنا مش حاسس بيها وبأزود عليها الشغل ولو ما غيرتش هدومي أبقي معفن ولازم أغير

و دايما دايما سيرة إبوها هي اللي علي لسانها ابويه كان بيعمل كذا وأبوية كان بيعمل كذا لو ابويا بيعمل الحاجة دي كان عملها كذا كرهتني في الراجل بالرغم من انني أحترمه وأراه مثلا اعلي لي

وياساتر علي التبويزة بتاعتها 

ولو ضحكت ياساتر علي التفاهة والمواضيع الهايفة اللي تتكلم فيها

رد الصديق كفاية خلاص عيطت وغرقت من الدموع  ايه ده وكنت بتنصحني إني اتجوز الحمد لله انه نجاني(لحد دلوقتي)

 هذا الحوار قد نجده علي لسان معظم الأزوج  والملفت للنظر إنه يقال بعد أسابيع قليلة من الزواج والمدهش أيضا اننا نجده علي لسان الزوجة بصورة مشابهة فهل تغير الزوجان فعلا ؟

سنتناول هنا جانب الزوجة  وهل هي تغيرت فعلا ولماذا تغيرت ؟ 

لاننا نتحدث هنا مع المراة ولا مجال لتلاوة الوصايا العشر علي ابو العيال

في الواقع انه ليس تغيرا ولكن المرأة عادت لطبيعتها التي تربت عليها في بيت اهلها فهي تربت علي سلوكيات وأفكار قد تتصادم مع ما تربي عليه ذلك الزوج ومن هنا تراه علي خطأ وأن كل ما يفعله غير صواب لأنه لايتوافق مع ما تربت عليه

حتي طريقتها في مواجهة ما يقابلها من هذه التطورات في الحياه تظل كما هي فهي تتعامل معه مثلما كانت تتعامل في بيت أهلها فهي تكشر وتبوز علشان تيجي أمها لتقول مالك يافلانه ويأتي الأب ويقول مالك ياحبوبة

لكن الزواج شيئ مختلف فهي الان اصبحت مسؤولة عن 

حوار جاد وعن بناء تواصل من نوع آخر مع هذا الرجل 

الجديد الغريب عنها

ثم يأتي هنا عامل آخر وهو الالتصاق العاطفي وهوان تجعل الزوج عالمها الوحيد...مصدر سعادتها وشقائها...ان أفرحها تكون سعيدة 

ان احزنها تكون حزينة وتبدأ في محاصرته

 كفايه نوم...أقعد معايا ماتخرجش اتكلم أنت ساكت ليه و تكون في خوف دائم أن يبعد عنها...أو يتركها وتكون دائمة الشكوي من عدم وجوده معها فيشعر الرجل بأنه مخنوق بهذا الحب وأحيانا كثيرة تطلب ذلك بعلو صوت أو تصفه بصفات لاتليق فيبدأالنفورويتطور الي عدم الاإحترام

لابد للزوجة أن تكون ماهرة في تقسيم اهتماماتها ومشاعرها  الجزء الأكبر لله... جزء لأهلها... جزءلأولادها... جزء لزوجها وجزء آخر لهواياتها المفيدة لها ولحياتها الزوجية ولعملها اذا كان لديها عمل

يعني تقصدي اسيبه يعمل ما بداله ؟

ياستي لأ لكن تعلمي فن التواصل معه والحوار الأنثوي الجميل 

وتعلمي تردي رد حريمي

 (ياه هو فيه رد حريمي ورد رجالي كده يعني زي الهدوم )

ايوه فيه ولازم تتعلميه

لا تكوني ام العريف

عاملة انك فاهمة كل حاجة وهاتك يانقد

انت مش بتعمل

لأ ماتعملهاش كده

هو ده عيش أو كل دي فاكهة 

ايه اللي انت جايبه ده والله الراجل ضحك عليك

ماتضربش الولد

انت ساكت ولا كأنك في البيت لازم تضرب الولد وتأدبه

(يعني يضربه ولا مايضربهوش حددي)

عارفة لازم يزهق ويقول مش فاهمها ولا هي فهماني

خففي من النقد واتركي لزوجك مساحة يتحرك فيها بدون المفتش كرومبو (اللي انتي متقمصة شخصيته)

ادخري زعلك للأمور الكبيرة.

 فلو زعلتي على كل تافه وصغيرة  ( حتى لو كان الموضوع مهم بالنسبة لكِ ) لن يكون وقع زعلك كبيراً على زوجك خصوصا لو حدثت أمور كبيرة لا سمح الله (ويقول مش عارف هي عايزة ايه هي دايما مبوزة وبتعيط )

لاتنزل دمعتك إلا للشديد القوي
الرجل عموماً لايحب المرأه البكايه الشكاية ..
لما تبكي ابكي لسبب مهم .. مش عمال علي بطال زي الحنفية البايظة

هذه بعض الظواهر العامة التي تجعل  الرجل يشعر بتغير المرأة بعد الزواج

وفي التدوينات القادم سوف نتطرق بالتفصيل لهذه الظواهر وأسباب أخري

فإلي تدوينة اخري استودعكم الله الذي لاتضيع ودائعه

 في انتظار تعليقاتكم