لا تتزوجي ليلي ثم تبحثي عن قيس

 سألتني بلهفة هل التفكير في رجل غيرزوجي خيانه ؟؟

بادرتها بسؤال وهل لو عرفتي ان ابو العيال مشغول باله بواحدة تانية وبيفكر فيها (بس ) مش حتطيني عشته

قالت بسرعة طبعا

خلاص جاوبتي انتي علي سؤالك

اللي ماترضهوش لنفسك ازاي ترضيه لغيرك

وإذا كان هو السبب ؟؟

هو السبب انتي السبب النتيجة واحدة خيااااااااااانة

قالت مش تسمعي الحكاية الاول وبعدين تحكمي

عندها حق لازم اسمع

 لأ ماعندهاش حق أسمع إيه أكيد حتحاول تقنعني إن الراجل اللي هو جوزها موريها الويل وضلام الليل وإنها مظلومة والحاجات دي يعني (أنا بكلم نفسي )

قطعت علي تفكيري وقالت كنت أبحث عن زوج لايقول رحتي فين ولا جيتي منين

حنين مايرفضليش طلب

وغني يجيب لي اللي أشاور عليه

يعني اللي بيسموه لارج (جنتل مان )

مش عقد زي الرجالة اللي بشوفهم في العيلة

 والدي كان صعب وماسك علينا أنا وإخواتي حتي الصبيان

معاد للدخول ومعاد للخروج يعني سي السيد

 وجاء العريس المطلوب والدي ماكنش موافق عليه وقالي مش حتكوني سعيدة معاه الراجل لازم يكون حمش راجل يعني

قلت له هو ده اللي أنا عايزاه

ووافقت عليه وبدأت أجهز الشقة علي كيفي وكل ماأسأله عن حاجة يقولي اللي انتي عايزاه خدي الفلوس وهاتي 

ارن له وأقوله أنا مع الصنايعي لوحدي

يرد علي وماله خلصي معاه أنا مش فاضي

كنت فرحانه بهذه الحرية التي كنت أفتقدها في بيت ابي وفي المقابل لم أجهد نفسي بمعرفة أي شيئ عنه كنت مشغولة بحريتي التي نلتها أخيرا  

ومرت السنوات وأنا أفعل ما بدالي لكنني كنت أشعر أن هناك شئ ينقصني

كان زوجي لايبخل علي بشئ ولا يسألني متي ولا اين

في يوم جاءت لي فكرة لزيادة البرستيج اجيب سواق للعربية

طلبت من زوجي أن يحضر لي سواق فقال لي لماذا انتي بتعرفي تسوقي ايه لزومه السواق

قلت له لازم السواق فوافق وجاب لي سواق راجل عجوز

بصيت له وقلت له أنا عايزة واحد صغير يستحمل اشخط فيه مش راجل كبارة أخاف منه

قال لي لأ وياريته أصر ومسك وتبت علي (لأ) دي لكنه استجاب لطلبي بدون عناء

استلم السواق الشغل

لا أدري متي بدأت أقارن بينه وبين زوجي عندما يتحدث الي زوجته ويسألها عن حالها ويطلب منها ألا تذهب هنا أو هناك

(يانهار أزرق الست إتجنت حاسدة التانية علي الخنقة)

قلت لها مش إنتي اللي عايزة كدة؟؟

كنت غلطانة هو الراجل هو اللي كان لازم يفهم معني الرجولة مش انا

آه منهم الستات دول مايعجبهمش العجب (قلت كدة في نفسي)

 اللي بيشكم مش عاجب واللي مطنش مش عاجب

المهم أصبحت أعتمد علي السواق في كل شؤون حياتي وأصبح يعلم عني كل شيئ مشاويري وصديقاتي

يختار معي ملابسي وإحتياجاتي أصبحت أقضي معه معظم وقتي

ومن خوفي أن يترك العمل طلبت من زوجي أن يرفع له المرتب وكنت أغدق علي زوجته بالهدايا حتي لاتتزمر من غيابه عنها وتتركه لي

(كيد النسا يتفاتله بلاد) قلت كده في نفسي

سألتها وأين زوجك ألم يلاحظ كل هذا ؟؟

قالت مشغول في عمله ليوفر لنا الحياة الرغدة التي أعيشها أنا وأولادي كان كلما طلبت منه أن يأتي لي بشئ يقول خدي فلوس وخلي السواق يجيب

أو أطلب منه أن يقضي معنا يوم في أي مكان يقول عندك السواق يوديكي ويجيبك

أنا الآن أخاف من نفسي أريد من زوجي أن يثور ويطرد السواق ويحميني من نفسي ومن شيطاني فأنا أصبحت لا أستطيع النوم من الإحساس بالذنب  

(لم انقل لك الكلام بحزافيره ولم أنقل لك المشاعر التي وصفتها السيدة وتركت لك تخمين ما تشعر به)

في بعض الأحيان تظن المرأة أن قيام الرجل  بمعرفه تفاصيل حياة زوجته  أوتدخله في القرارات التي تخصها نوع من أنواع التشدد 

وغذي هذه الأفكار والظنون الحركات النسوية التي تأتي بما في الغرب كما هو من دون تمحيص

بيني وبين نفسي تألمت لها(صعبت عليا يعني ) وتساءلت من المسؤول

هي باختيارها

ام الزوج بعدم تقديره لدوره ومنزلته التي تخلي عنها عن طيب خاطر وفهمه غلط لمعني الرجولة وأنها تمويل بس

أم الأهل اللي ربوا بنتهم علي الشدة ولم يؤهلوها لحسن الاختيار 

 ولم يعلموها إن الراجل مش بس بماليته الراجل برعايته لبيته وأسرته

فتعلمت هي من نفسها إن الراجل مش بكلمته(خالص ) الراجل بفلوسه وبدلته وكمان عربيته.

إلي كل من تشتكي من غيرة زوجها

الي كل من تشتكي من تدخلات زوجها

الي كل من تشتكي من سيطرة الزوج

إقرئي هذه القصة واستخلصي منها مايفيدك

 فكثيرات مثل صاحبتنا دي عايزة جوزها  يغير

(ويجرب نارالغيرة ) ويحس ويشخط ويحميها من أشياء كثيرة

وإلي كل زوج

 كيف تستقيم السفينة وربانها مشغول ولايهمه من يدير الدفة 

 يخطئ الرجل إذا تخلي عن تعهده لبيته تحت أي سبب فهو لايدري في أي ركن يقف الشيطان ولا متي يهجم ويقوض أركان البيت

تعهد بيتك وكن الصدر الحنون والرجل المسؤول العطوف

عد الي بيتك وكن (قيس) بدلا من أن تبحث عنه زوجتك

وإلي تدوينة قادمة استودعكم الله الذي لاتضيع ودائعه

في انتظار تفاعلكم